Gelserberjer Blad!

Wie ich noch e Kend war schwadzde alle anere Kenge Blad.

Weil ich als kleena Jonge awwer dabei geheern wull, müsd ich genau so schwadze wie die. Un weil meer daheem „Vornehm“ schwazde, hirr ich sist ned dabei gehard.

Bis züm Krigg schwadzde alle Leire em Darf blad, awwer das Gelserberja Blad war anerschd wie das enn denn Därfern drimrim. Derchs beifreie un züziehn vaänerde sich die Sprache derch denn ähre nauwe Wärder die se merre broachde.

Enn denn anere Därfer schwadzde se so ähnlich awwa ma heerd am kleene engascheed aus willem Darf se kame. Uff denn kleene Derfern drimrim, höt doas Blad sich besser gehaln weil se mieh abgescheere warn.

Das Gelserberjer un das Hochläner Blad engersched sich vun dämm Owahessische, dämm Gemingsche, dämm Ingahessische un dämm Schwälmer Blad. Die schwadzde ganz anerschd.

Vum Afang vum Krigg a veränerd sich das Gelserberjer Blad, weil als mieh Enqadiering, Flichtlinge Imsiedler koame die ähre ejene Schbroche merre broachde. Un weil die Leire hie em Darf ned fehr dumm gehoaln wern wulle, prowirde se öh hochdeitsch se schwadze, awwer veele kunnes ned.

Nü sing ich achziz Johr un geheer zü denn wingsde die noch Blad schwadze kunn, desweje well ich enn dis kleene Bichelche poar Wärder uffschreiwe, des minge Kenge un Enckelkenge, un velicht gets je noch e poar die sich dafeer indresiern deere, nochmo läse kunn wie mer frieher hie geschwazd höt. Wobei ma öh nid vagesse sall, des doas Blad öh e schdäck Guldur ess.

Auwer Nordmanns Horst